முகப்பு விண்ணியல் சூரியத் தொகுதியைப் பற்றி ஒரு வேகப்பார்வை

சூரியத் தொகுதியைப் பற்றி ஒரு வேகப்பார்வை

118
0

சூரியனை மையமாகக் கொண்டு சுற்றிவரும் பல விண்வெளிப் பொருட்களை உள்ளடக்கியது இந்த சூரியத் தொகுதி. பூமி போல கோள்கள், விண்கற்கள், சிறுகோள்கள், துணைக்கோள்கள், வால்வெள்ளிகள், சிறுகோள் பட்டி, கைப்பர் பெல்ட், ஊர்ட்மேகம் இப்படி பல அம்சங்கள் நிறைந்தது இது. இந்தப் பகுதியில் சூரியத் தொகுதியில் இருக்கும் முக்கிய ஆசாமிகளைப் பற்றி வேகமாக பார்க்கலாம் வாருங்கள்.

சூரியன் தொடக்கம் புளுட்டோ வரை, ஒவ்வொன்றைப் பற்றியும் முக்கியமான பத்து விடையங்கள் இதோ!

சூரியனைப் பற்றி 10 விடையங்கள்

சூரியன் ஒரு விண்மீன். விண்மீன்கள் திண்ம மேற்பரப்பைக் கொண்டிருக்காது. இது முழுதும் வாயுக்களால் உருவான ஒரு கோளவடிவப் பொருள். சூரியனில் அண்ணளவாக 70% ஐதரசன், 28% ஹீலியம் காணப்படுகிறது. மேலும் கார்பன், நைட்ரஜன் மற்றும் ஆக்சிஜன் 1.5% உண்டு.

சூரியத்தொகுதியின் மையத்தில் இருக்கும் சூரியனில், சூரியத்தொகுதியில் இருக்கும் மொத்தத் திணிவில் 99.8% ஆன திணிவு இருக்கிறது.

சூரியன் ஒரு வீட்டின் வாசல்க் கதவின் அளவிருந்தால், பூமி ஒரு பைசா நாணய அளவிருக்கும்.

சூரியனுக்கு திடமான திண்ம உடல் இல்லாததால், சூரியனின் வேறு பகுதிகள், வேறு வேகத்தில் சுழல்கின்றான். சூரியன் தன்னைத் தானே சுற்ற, மத்தியில் 25 பூமி நாட்களும், துருவங்களில் 36 பூமி நாட்களும் எடுக்கின்றது.

சூரியனது “வளிமண்டலத்திலேயே”, சூரியப் புள்ளிகள் (sun spots) மற்றும் சூரிய நடுக்கம் (solar flares) என்பன ஏற்படுகின்றன. சூரியனது வெளி வளிமண்டலமானது, ப்ளுட்டோவின் சுற்றுப் பாதைக்கும் வெளியில் செல்லும் அளவிற்கு பெரியது.

சூரியனைச் சுற்றி, 8 கோள்களும் (planets), குறைந்தது 5 குறுங்கோள்களும் (dwarf planets), ஆயிரக்கணக்கான சிறுகோள்களும் (asteroids), லட்சக்கணக்கான வால்வெள்ளிகளும் சுற்றி வருகின்றன.

சூரியனுக்கு எந்தவித வளையங்களும் (சனிக்கு இருப்பதைப் போல) கிடையாது.

சூரியனது சக்தி இல்லாவிட்டால், பூமியில் உயிர் தோன்றி இருக்கவோ, அல்லது வாழவோ முடியாது.

சூரியனது மேற்பரப்பு வெப்பநிலை அண்ணளவாக 5500 பாகை செல்சியஸ்.

சூரியனது மையப் பகுதியில் வெப்பநிலை 15 மில்லியன் பாகை செல்சியஸ்.

புதனைப் பற்றி 10 விடயங்கள்

சூரியத்தொகுதியிலேயே மிகச் சிறிய கோள் புதன் – பூமியின் நிலவைவிட சற்றுப் பெரியது.

சூரியனுக்கு மிக அருகில் இருக்கும் கோளும் இதுவாகும் – சூரியனில் இருந்து அண்ணளவாக 58 மில்லியன் கிலோமீற்றர் தூரத்தில் இருக்கிறது.

புதன் தனது அச்சில் ஒரு முறை சுற்றிவர 59 பூமி நாட்கள் எடுக்கிறது, அதேபோல சூரியனை வெறும் 88 பூமி நாட்களில் சுற்றி வந்துவிடும்.

புதன் பூமியைப் போல ஒரு திண்மக்கோளாகும்.

புதனுக்கு மிக மிக மெல்லிய வளிமண்டலம் உண்டு. இது ஒக்சீசன், சோடியம், ஐதரசன், ஹீலியம் மற்றும் பொட்டாசியம் ஆகிய மூலக்கூறுகளால் ஆக்கப்பட்டுள்ளது.

புதனுக்கு துணைக்கோள்கள் கிடையாது. புதனுக்கு, சனியைப் போல அதனைச் சுற்றி வளையங்கள் கிடையாது.

புதனை இதுவரை 2 வின்கலங்களே சென்று ஆராய்ந்துள்ளன. 1974 இல் மரினர் 10 மற்றும் 2011 இல் மசென்ஜர்.

புதனில் உயிர் இருப்பதற்கான எந்தவொரு தடயமும் இல்லை. ஆனால் துருவப் பகுதிகளில் உள்ள பள்ளத்தாக்குகளில் நீர் உறைந்திருப்பதை கண்டறிந்துள்ளனர்.

பகல்வேளையில் மேற்பரப்பு வெப்பநிலை 430 பாகை செல்சியஸ் ஆகவும், இரவில் -180 பாகை செல்சியசாகவும் குறைவடைகின்றது.

புதனில் இருந்து சூரியனைப் பார்த்தால், பூமியில் தெரிவதைவிட, சூரியன் மூன்று மடங்கு பெரிதாகத் தெரியும்.

வெள்ளியைப் பற்றி 10 விடயங்கள்

வெள்ளி, பூமியைவிட சிறிதளவே சிறியது. பூமியின் விட்டம் 12742 km, வெள்ளியின் விட்டம் 12104 km.

சூரியனுக்கு அண்மையில் இருக்கும் இரண்டாவது கோள். இது சூரியனில் இருந்து 108 மில்லியன் கிலோமீற்றர் தூரத்தில் சூரியனைச் சுற்றி வருகிறது.

வெள்ளியில் ஒரு நாள் என்பது, பூமியில் 243 நாட்களாகும். அதாவது வெள்ளி தன்னைத் தானே சுற்ற 243 பூமி நாட்கள் எடுக்கின்றது.

வெள்ளி ஒருமுறை சூரியனைச் சுற்றிவர 225 பூமி நாட்கள் எடுக்கின்றது.

வெள்ளி ஒரு பாறைக்கோளாகும். இதனது மேற்பரப்பு, எரிமலை வெடிப்புக்களால் உருவாக்கப்பட்டதாக ஆய்வாளர்கள் கருதுகின்றனர்.

வெள்ளியின் தடிப்பான வளிமண்டலம் காபனீர்ஒக்ஸைட், நைதரசன் என்பவற்றால் ஆக்கப்பட்டுள்ளது. இதன் மேகங்கள் சல்பூரிக் அமிலத் துளிகளால் ஆக்கப்பட்டுள்ளது.

வெள்ளிக்குத் துணைக்கோள்கள் இல்லை.

இதுவரை வெள்ளியை கிட்டத்தட்ட 40 விண்கலங்கள் பார்வையிட்டுள்ளன. 1990 களில் சென்ற மெகல்லன் விண்கலம் வெள்ளியின் 98% ஆன மேற்பரப்பை கணக்கெடுத்தது.

வெள்ளியின் மேற்பரப்பு வெப்பநிலை 480 பாகை செல்சியஸ். சூரியத்தொகுதியிலேயே அதிகளவான மேற்பரப்பு வெப்பநிலையை கொண்ட கோள் இது. இங்கு உயிர்கள் இருப்பதற்கான எந்தவொரு தடயமும் கண்டுபிடிக்கப்படவில்லை.

வெள்ளி மட்டுமே கிழக்கில் இருந்து மேற்காக சுற்றும் ஒரே ஒரு கோளாகும். இங்கு சூரியன் மேற்கில் உதித்து, கிழக்கில் மறையும்.

பூமியைப் பற்றி 10 விடயங்கள்

சூரியனில் இருந்து மூன்றாவதாக இருக்கும் கோள். அண்ணளவாக 150 மில்லியன் கிலோமீற்றர் தூரத்தில் இருக்கிறது.

பூமி தன்னைத்தானே சுற்ற 24 மணித்தியாலங்களும், சூரியனை ஒரு முறை சுற்றிவர 365 நாட்களும் எடுக்கிறது.

புதன், வெள்ளியைப் போல பூமியும் ஒரு பாறைகளாலான கோளாகும். இதன் மேற்பரப்பில் மலைகள், பள்ளத்தாக்குகள், சமவெளிகள் என பல்வேறுபட்ட அம்சங்கள் காணப்படுகின்றன.

மற்றைய எல்லாக் கோள்களைவிடவும், பூமி சற்று வித்தியாசமானது. இதன் மேற்பரப்பு 70% நீரினால் மூடப்பட்டுள்ளது.

பூமியின் வளிமண்டலம் 78% நைதரசனாலும், 21% ஒக்சீசனாலும், மற்றைய 1% ஏனைய வாயுக்களாலும் ஆக்கப்பட்டுள்ளது. இந்த வாயு விகிதாசாரம், நாம் சுவாசிக்கத் தேவையான ஒரு வளிமண்டலத்தை உருவாகியுள்ளது.

பூமிக்கு ஒரு துணைக்கோள் உண்டு – சந்திரன்.

பூமியைச் சுற்றி எந்த வளையங்களும் (சனிக்குஇருப்பது போல) இல்லை.

பூமி உயிர்வாழத் தகுதியான கோளாகும். நாமறிந்து உயிர்வாழத் தகுதியான கோள் இது மட்டுமே.

பூமியின் வளிமண்டலம், வின்கற்களில் இருந்து எம்மைப் பாதுகாக்கிறது. பெரும்பாலான வின்கற்கள் வளிமண்டலத்திலேயே எரிந்து விடுகின்றன.

பூமியில் உள்ள கண்டங்கள் தொடர்ந்து நகர்ந்துகொண்டே இருக்கின்றன. இது பூமியின் மற்பரப்பை வடிவமைப்பதில் செல்வாக்குச் செலுத்துகின்றன.

செவ்வாயைப் பற்றி 10 விடயங்கள்

சூரியனைச் சுற்றிவரும் கோள்களில் செவ்வாய் நான்காவது கோளாகும். அண்ணளவாக சூரியனில் இருந்து 228 மில்லியன் கிலோமீற்றர் தூரத்தில் சூரியனைச் சுற்றுகிறது.

பூமியைப் போலவே, செவ்வாயும் தனது அச்சில் சுழல கிட்டத்தட்ட 24 மணிநேரங்கள் எடுக்கின்றது, ஆனால் சூரியனைச் சுற்றிவர 687 பூமி நாட்கள் எடுக்கின்றது.

செவ்வாய் பூமியின் அளவில் பாதியளவு இருக்கும். இதன் விட்டம் 6778 கிலோமீற்றர்கள் ஆகும்.

பூமியைப் போலவே செவ்வாயும் ஒரு பாறைக்கோளாகும். செவ்வாயின் மேற்பரப்பு, எரிமலை வெடிப்பு, விண்கற்களின் மோதல்கள் மற்றும், மேலோட்டு அசைவு, மற்றும் காலநிலை என்பனமூலம் மாற்றமடைந்துள்ளது.

செவ்வாய்க்கு பூமியைவிட மெல்லிய வளிமண்டலம் உண்டு. அது பெரும்பாலும் காபனீர் ஒக்ஸ்சைடு, நைதரசன் மற்றும் ஆர்கன் போன்ற வாயுக்களால் ஆக்கப்பட்டுள்ளது.

செவ்வாய்க்கு இரண்டு துணைக்கோள்கள் உண்டு. ஒன்று போபோஸ், மற்றயது டேய்மொஸ்.

செவ்வாய்க்கு சனியைபோல அதனைச் சுற்றி வளையங்கள் இல்லை.

இதுவரை 40 இற்கும் மேற்பட்ட விண்கலங்கள், தரை உலாவிகள் செவ்வாய்க்கு அனுப்பப்பட்டுள்ளன. செவ்வாய்க்கு முதன் முதலில் வெற்றிகரமாக அனுப்பப்பட்ட விண்கலம் மாரினர் 4 ஆகும். இது 1965 இல் செவ்வாய்க்கு அனுப்பப்பட்டது.

இப்போது இருக்கும் செவ்வாய், உயிர் வாழத் தேவையான காரணிகளைக் கொண்டில்லை. முன்னொரு காலத்தில் செவ்வாயில் உயரினம் வாழத் தேவையான காலநிலை இருந்ததாக ஆய்வாளர்கள் கருதுகின்றனர்.

செவ்வாய், சிவந்த கிரகம் என அழைக்கப்படக் காரணம், செவ்வாய் மணலில் இருக்கும் இரும்புக் கனிமங்கள் துருப்பிடிப்பததனால் ஆகும். மற்றும் செவ்வாயில் இருக்கும் பாரிய புயல்கள் இந்த துருபிடித்த தூசுகளை கோள் முழுவதும் காவிச்செல்கிறது.

வியாழனைப் பற்றி 10 விடயங்கள்

சூரியனைச் சுற்றிவரும் 5 ஆவது கோள் வியாழனாகும். சூரியனில் இருந்து 778 மில்லியன் கிலோமீற்றர்கள் தூரத்தில் சூரியனைச் சுற்றி வருகிறது.

வியாழனில் ஒரு நாள் என்பது அண்ணளவாக வெறும் 10 மணித்தியாலங்களே. ஆனால் சூரியனைச் சுற்றிவர 12 பூமி வருடங்கள் எடுக்கிறது.

வியாழன் ஒரு வாயு அரக்கனாகும். இதனால், பூமியில் இருப்பது போன்ற திடமான நிலப்பரப்பு, வியாழனில் இல்லை. ஆனால் வியாழனின் மையப்பகுதியில் பூமியளவு திண்மக்கோளம் இருப்பதாக ஆய்வாளர்கள் கருதுகின்றனர்.

வியாழன், ஐதரசன் மற்றும் ஹீலியம் போன்ற வாயுக்களால் ஆக்கப்பட்டுள்ளது.

வியாழனின் அகப்பகுதியில் அமுக்கம் அதிகம் என்பதால், ஐதரசன் வாயு திரவநிலையில் அங்கு இருக்கிறது.

வியாழனுக்கு 50 உறுதி செய்யப்பட்ட துணைக்கோள்களும், 17 இன்னமும் உறுதி செய்யப்படாத துணைக்கோள்களும் உண்டு.

சனியைப் போல, வியாழனுக்கும் மிக மிக மெல்லிய வளையம் உண்டு. இது 1979 இல் வொயேஜர் விண்கலம் வியாழனுக்கு அருகில் செல்லும் போது கண்டுபிடிக்கப்பட்டது.

வியாழனுக்கு பல விண்கலங்கள் அனுப்பப்பட்டுள்ளன. ஜூனோ விண்கலம், 2016 இல் வியாழனைச் சென்றடைந்தது.

வியாழனில், நாமறிந்து உயிர்வாழத் தேவையான காரணிகள் இல்லை. ஆனால் வியாழனின் சில துணைக்கோள்களில் உயிர் வாழத் தேவையான காரணியான நீர் இருப்பது கண்டறியப்பட்டுள்ளது.

வியாழனின் மேற்பரப்பில் தெரியும் பெரிய சிவப்புப் புள்ளி ஒரு பாரிய புயலாகும். இந்தப் புயல், 3 பூமியை அதனுள் புதைக்கும் அளவிற்கு பெரியது. மற்றும், இது பலநூறு வருடங்களாக தொடர்ந்து வீசிக்கொண்டு இருக்கிறது.

சனியைப் பற்றி 10 விடயங்கள்

சூரியனைச் சுற்றிவரும் ஆறாவது கோள் சனியாகும். சூரியனில் இருந்து அண்ணளவாக 1.4 பில்லியன் கிலோமீற்றர்கள் (9.5 AU) தூரத்தில் சூரியனைச் சுற்றுகிறது.

சனி தன்னைத்தானே சுற்ற 10.7 மணித்தியாலங்கள் எடுக்கின்றது. அதேபோல சூரியனை ஒருமுறை சுற்றிவர 29 பூமி ஆண்டுகள் எடுக்கிறது.

வியாழனைப்போல சனியும் ஒரு வாயு அரக்கனாகும். பாறைகளால் ஆன மேற்பரப்பு அற்ற வெறும் வாயுக்கோள்.

சனியின் மேற்பரப்பு ஐதரசன் மற்றும் ஹீலியம் போன்ற வாயுக்களால் ஆக்கப்பட்டுள்ளது. சனியின் மையப்பகுதியில் வியாழனைப்போலவே பாறையால் ஆன கோளம் ஒன்று இருக்ககூடும் என்றும் ஆய்வாளர்கள் கருதுகின்றனர்.

சனிக்கு உறுதிசெய்யப்பட்ட 53 துணைக்கோள்களும், உறுதிசெய்யப்படாத 9 துணைக்கோள்களும் உண்டு.

சூரியத்தொகுதியிலேயே மிக அழகான, பெரிய வளையங்களைக் கொண்டுள்ள கோள் சனி மட்டுமே. இந்த வளையங்களில் பல்வேறு பிரிவுகளும், இடைவெளிகளும் இருக்கின்றன.

சனியின் வளையங்கள், பனிக்கட்டித் துகள்களால் ஆக்கப்பட்டுள்ளது. இந்த வளையங்களின் சராசரித் தடிப்பு வெறும் 10 மீட்டர்கள்தான்.

சனிக்கு இதுவரை 5 விண்கலங்கள் அனுப்பப்பட்டுள்ளன. 2004 இல் இருந்து, கசினி விண்கலம், சனியையும், அதன் வளையங்கள் மற்றும் துணைக்கோள்களை ஆராய்ந்துவருகிறது.

நாமறிந்து சனியில் உயிர்வாழத்தேவையான காரணிகள் இல்லை. ஆனால் சில சனியின் துணைக்கோள்களில் திரவமாக நீர் இருப்பது கண்டறியப்பட்டுள்ளது. இது அங்கு உயிர் தோன்றுவதற்கான காரணியாக இருக்கலாம்.

சனியின் காந்தப்புலமானது பூமியின் காந்தப்புலத்தைப் போல 578 மடங்கு அதிகமானது.

யுரேனசைப் பற்றி 10 விடயங்கள்

சூரியனைச் சுற்றிவரும் 7வது கோள் யுரேனஸ் ஆகும். இது சூரியனை 2.9 பில்லியன் கிலோமீற்றர்கள் தூரத்தில் சுற்றி வருகிறது. (19.19 AU)

யுரேனசில் ஒரு நாள் என்பது 17 மணித்தியாலங்கள் ஆகும். அதேபோல சூரியனை ஒரு முறை சுற்றிவர 84 வருடங்கள் எடுக்கின்றது.

இது ஒரு ‘பனி அரக்கன்’ வகைக் கோளாகும். அதாவது இந்தக் கோளானது ‘பனி’யால் ஆன மூலப்பொருட்களால் உருவாக்கப்பட்டுள்ளது. அதாவது நீர், மெதேன் மற்றும் அமோனியா.

பாறையால் உருவான சிறு மையப்பகுதி யுரேனசுக்கு உண்டு.

யுரேனசின் வளிமண்டலம் பெரும்பாலும் ஐதரசன், ஹீலியம் மற்றும் சிறிதளவு மெதேன் வாயுக்களால் ஆக்கப்பட்டுள்ளது.

யுரேனசுக்கு 27 துணைக்கோள்கள் உண்டு. இவற்றின் பெயர்கள், வில்லியம் ஷேக்ஸ்பியர், மற்றும் அலக்ஸாண்டர் போப் எழுதிய கதைகளில் வரும் பாத்திரங்களின் பெயர்களாகும்.

யுரேனசுக்கும் சிறிய, மெல்லிய வளையங்கள் உண்டு.

இதுவரை யுரேனசுக்கு அருகில் சென்ற ஒரே விண்கலம் வொயேஜர் 2 மட்டுமேயாகும்.

யுரேனசில், நாமறிந்து உயிர் வாழத்தேவையான காரணிகள் எதுவும் இல்லை.

வெள்ளிக் கோளைப் போல, கிழக்கில் இருந்து மேற்காக சுற்றும் மற்றைய ஒரே கோள் இந்த யுரேனஸ், ஆனாலும் இது மற்றைய கோள்களைப் போல நிலைக்குத்தாக சுழலாமல், கிடையாக சுழல்கிறது.

நெப்டியுனைப் பற்றி 10 விடயங்கள்

சூரியனைச் சுற்றிவரும் 8ஆவது கோள் நெப்டியூன் ஆகும். அண்ணளவாக சூரியனில் இருந்து 4.5 பில்லியன் கிலோமீற்றர்கள் (30 AU) தொலைவில் சூரியனைச் சுற்றுகிறது.

நெப்டியூன் தன்னைத்தானே சுற்ற 16 மணிநேரங்கள் எடுக்கிறது, அதேபோல சூரியனை ஒருமுறை சுற்றிவர 165 பூமி வருடங்கள் எடுக்கிறது.

யுரேனசைப் போல நெப்டியுனும் ஒரு ‘பனி’ அரக்கனாகும். இது பெரும்பாலும் நீர், அமோனியா மற்றும் மெதேன் ஆகிய மூலக்கூறுகளால் ஆக்கப்பட்டுள்ளது.

நெப்டியுனின் மையப்பகுதியில் பூமியளவுள்ள பாறைக்கோளம் இருக்கலாம் என ஆய்வாளர்கள் கருதுகின்றனர்.

நெப்டியுனின் வளிமண்டலம், ஐதரசன், ஹீலியம் மற்றும் மெதேன் ஆகிய வாயுக்களால் ஆக்கப்பட்டுள்ளது.

நெப்டியுனுக்கு 13 உறுதிசெய்யப்பட்ட துணைக்கோள்கள் உண்டு. இவற்றுக்கு, கிரேக்க நீர்க் கடவுள்களின் பெயர்களே வைக்கப்பட்டுள்ளன.

நெப்டியுனுக்கும் சனியைப் போலவே அதனைச் சுற்றி ஆறு வளையங்கள் உண்டு.

யுரேனசைப் போலவே, நெப்டியுனுக்கும் அருகில் சென்ற ஒரே விண்கலம் வொயேஜர் 2 மட்டுமே.

நெப்டியுனில் நாமறிந்த உயிர் வாழத் தேவையான காரணிகள் இல்லை.

புளுட்டோ, சூரியனில் இருந்து நெப்டியுனைவிட மிகத் தொலைவில் சுற்றினாலும், சில வேலைகளில், அது நேப்டியுனை விட சூரியனுக்கு அருகில் செல்கிறது, இதற்கு காரணம், புளுட்டோவின் நீள்வட்டப் பாதையே.


சூரியத் தொகுதியில் வெறும் கோள்கள் மட்டும் இல்லை. ஆனால் அவைதான் தொகுதியின் முக்கிய புள்ளிகள் எனலாம். வால்வெள்ளிகள், விண்கற்கள், குறள்கோள்கள், கைப்பர் பட்டி, ஊர்ட் மேகம் என சூரியத் தொகுதி பல விசித்திரங்களையும் அற்புதங்களையும் கொண்டுள்ளது.

தகவல் மற்றும் படங்கள்: நாசா